|
يقولوا لهم : ولاشي ماغير بتلابج نشتي الشعب يرتاح . ويسكبوا لهم زلط منسب يسدوا ويربخ الشعب . وتكمل الزلط ويتلابجوا من جديد زلط المفارعة ، وتجي زلط جديدة ويسدوا ويتفقوا والحمد لله ، وتكمل ويقع ملباجي يغوبر بالعالم ، وينبعوا المفارعين كالعادة : ماهو ياخبره ، ما وقع؟ قالوا مابلا ما سديناش والشعب ماربخش . ويكرعوا لهم زلط منسب يسدوا والشعب يربخ . ويسدوا ويقرح ملباجي اغبر على شكل الربخة ..كل واحد معه تصور خاص لطريقة الربخة حقنا . وتلابج على الربحة ، وينبع العالم يقرغ وخلاص ياجماعة سدوا وخلوا كل واحد يربخ بالطريقة اللي تناسبة . .يقولوا مع الربخة لها ثوابت ، يندعوا مضرابي اعمى لوما يطلع الغبار ، وينبعوا الجيران : ماهوه ياجن ماوقع ؟ يقولوا مابلا ماسديناش على الثوابت . وينعثوا لهم زلط لأجل يسدوا على الثوابت ولاجل الشعب يربخ .
ويتفقوا ويتقاسموا والحمد لله ، ويختلفوا تلفوا على الزلط الأولة . وانت معك ، قال أنت معك ويقع ملباجي اغبر ، ويسدوا . وينبع للوسط طرف ثالث يقلهم : تسدوا وتتقاسموا واحنا لا حرام ماتنزل طبه ، ويعتصدوا وينبعوا الجيران : ماهوه ياجن شغلتونا ، ماهوه الذي تشتوه بالضبط ؟ يقولوا ماسديناش والشعب ماربخش . ويكرعوا لهم زلط للربخة ويسدوا وعلى مجلس يضم الكل ، وتبدأ حقي قال حق ، ويتلابجوا لوما تقشبب صحراء الربع الحالي من حقنا الغبار . وعليها من يوم ماطلب سيف بن ذي يزن مفارعين من الفرس ، وبلادنا مسرح للمضرابة وللمفارعين ولليوم وإحنا في نفس اللبيج ولاخرجنا لاطريق .
طيب لموه العصيد هذا كله بحجر الله ؟ يقلك مابلا نشتي الشعب يربخ . هوذا احنا الان شعب رابخ للطرف . العالم من حوانا يتطور ويكبر ، واحنا رابحين لامهرة ولا عمل ولاحياة و كل واحد مننا ماسك شعر الثاني وهات ياسحبله وملابيج ، وقلك من أين بيجي هذا الغبار؟!
اجزم ان حضارات اليمن القديمة لم تطمرها عوامل التعرية او غبار التاريخ، بل طمرتها الربخة وغبار ملابيجنا في انتظار المفارعين ، واكلنا داريين أن محد يفارع بلاش .
- نقلا عن صحيفة اليمن اليوم:
في الإثنين 23 فبراير-شباط 2015 04:08:24 م